Mes e medio de folga nos xulgados de Viveiro

23 de marzo de 2018

"publicado en praza pública"

Por Marco López

Xulgados de Viveiro

O caos aséntase nos xulgados tras mes e medio de folga indefinida na Administración de Xustiza. O apoio do 100% do cadro de persoal viveirense fixo que, ademais da suspensión habitual de xuízos, tampouco se estean a celebrar con normalidade outros moitos trámites como declaracións penais (de persoas prexudicadas, testemuñas ou investigadas), comparecencias, apoderamentos, actuacións habituais non-urxentes do Rexistro Civil e información xeral.
Desde os dous Xulgados de Viveiro lamentamos fondamente o prexuízo que se lle está a ocasionar tanto á cidadanía como aos profesionais da avogacía e a procuradoría, que están sendo moi respectuosos coas nosas reivindicacións laborais a pesar de padecer de primeira man a parálise dos expedientes xudiciais. É de agradecer a educación que amosan con nós na súa gran maioría, debido á enorme perda de ingresos que lles supón este paro.